有傷在身嘅巴西球星尼馬，因為小腿二級拉傷正治療當中，但巴西媒體最新消息引述，呢位34歲老將傷勢唔樂觀，可能錯過晒世界盃3場分組賽，但由於球員換人截止期限（當地時間周五晚上7點）已過，巴西決定保留尼馬喺陣中。
早前外界一度傳聞，如果尼馬喺6月12日前未能康復，領隊安察洛堤就會將佢剔出大軍名單，另覓替補。周一（8日）巴西足協曾出面發表官方聲明，尼馬接受磁力共振檢查，顯示康復進度良好，屬預期之內，會按原定計劃治療同訓練，另外安察洛堤亦曾明確表示：「我哋預計尼馬有望踢首場對摩洛哥，就算第一場唔得，第二場都可以上陣。我唔會更換名單上任何球員。」
換言之，巴西在小組賽階段等於少咗1人作調配，「森巴兵團」身處C組，對手包括摩洛哥、海地及蘇格蘭，尼馬能唔能夠趕得切喺淘汰賽復出，將成為巴西嘅關鍵變數。